arablog.org

حكاية لصليحة ..

صليحة يا لكافية، في بالك غناك معاش يجد عليا ؟
معاش يبكيني ، معاش يٌعرق جبيني ومعاش يشعل النيرانْ
يا صليحة سالم مشى و ما ولى ، و نٌبر نسات الثارْ
و النجمة ما طلعت و شامة الخضراء ضاعت بين الجبال
لا عرفت ثنية و لا شقت الواد و لا جاوها صيادة
الناس تقولْ: مشات مع العزابةْ ؟ و ناس تقول :تستنى في رجال الحمادة
و جلاص يقولوا: بدلت الثنية و نحات الشامة و حلت الضفاير و شقت الخلا
يا صليحة مولات الشامة ضاعت و البلاد تباعت
وبومخلوف واقف على الرقوبة يستنى في الأمارة
هاو قال جايينو الخيالة ..
و الخيالة عملوا كيفي هجوا من البلاد و تركوا العباد
و قالوا عليك كذابة .
ماك قلتهم في الغربة فناني عمري راح
و كي خرجنا لقينا الغربة داوات الاجراح و في الغربة مسحنا الدموع
في بلاد الناس ضحكنا و ما جعنا و متذلينا و ما مبكينا
يا صليحة تونس قتلنا *** يا صليحة الكاف الحزينة
حتى الجبال معادت لينا*** سكنها الظٌلامْ و أولاد الحرامْ.
تعرف يا صليحة في غربتنا شعلنا الشمع و نادينا يا رجال الكاف
و جانا بومخلوف و البشير و الشيخ الزاير و بوغربال
في بلاد الناس رينا الصالحين و هزينا السناجق
نهار إلي فَزعتْ المنوبية بحرامها و بخلالها و بكتابها
جات هايضة ما فرزتنش شكون قدامها..
سبقت الرجال و فاتت الخيالة و قالت: ناري على أولادي
في بلاد الناس مشتاقين *** و في تونس مُضامينْ
و تحت الأرض منسيين و في السماء …
ربك غفار الذنوب..
يا صليحة ، هز راسك و مٌتبكيشْ رانا راجعين لبومخلوف
عازمين على الميعاد و مفزعين البلاد.
جايين و أضرب اللوطى بخلخالك و هز الطرق و حد ميسالك
يا صليحة راك الغزالة الجبلية ….
و مهما بعدنا غناك يجد عليا.
الفنانة التونسية صليحة

Leave a Comment

لن يتم نشر عنوان بريدك الإلكتروني. الحقول الإلزامية مشار إليها بـ *